ଶ୍ରେୟ ତରଙ୍ଗ ( କନ୍ଧମାଳ ବ୍ୟୁରୋ) : ଆଇନଜୀବି ପିତବାସ ପଣ୍ଡା ହତ୍ୟା ମାମଲାରେ, ମୁଖ୍ୟ ଅଭିଯୁକ୍ତ ଶିବ ଶଙ୍କର ଦାସ ଓରଫ ( ପିଣ୍ଟୁ ଦାସ) କୁ ଆଜି ଫୁଲବାଣୀ ମଣ୍ଡଳ ଜେଲ କୁ ଅଣାଯାଇଛି । ସୁରକ୍ଷା ଦୃଷ୍ଟିରୁ ସଶସ୍ତ୍ର ପୋଲିସ ବାହିନୀ, ବ୍ରହ୍ମପୁର କାରାଗାର ରୁ, ପିଣ୍ଟୁ କୁ ଆଣି ଫୁଲବାଣୀ ଜେଲ ରେ ଛାଡିଥିଲେ । ବ୍ରହ୍ମପୁର ବିଏମସି ର ପୂର୍ବତନ ବିଜେଡି ମେୟର ହେଉଛନ୍ତି ପିଣ୍ଟୁ ଦାସ । ସୁରକ୍ଷା ଦୃଷ୍ଟିରୁ, ଓ ତଦନ୍ତ କୁ ସଠିକ୍ ରାସ୍ତା ରେ ନେବା ପାଇଁ ରାଜ୍ୟସରକାର ଏଭଳି ପଦକ୍ଷେପ ନେଇଛନ୍ତି । ବ୍ରହ୍ମପୁର ଜେଲ ରେ ପିଣ୍ଟୁ ଙ୍କ ସମର୍ଥକ ମାନେ ରହୁଥିବାରୁ, ତଦନ୍ତ ଓ ସୁରକ୍ଷା ଦୃଷ୍ଟିରୁ ଆଜି ପିଣ୍ଟୁ କୁ ଫୁଲବାଣୀ ଜେଲ କୁ ଅଣା ଯାଇଛି ।
ଅନ୍ୟପଟେ, ଆଇନଜୀବି ପିତବାସ ପଣ୍ଡା ହତ୍ୟା ମାମଲା ଲଢ଼ିବା ପାଇଁ , ଦୁଇ ସ୍ବତନ୍ତ୍ର ସରକାରୀ ଓକିଲଙ୍କୁ ନିୟୋଜିତ କରିବାକୁ ବ୍ରହ୍ମପୁର ଏସ୍ପି ଚିଠି ଲେଖିଛନ୍ତି । ସିବିଆଇର ପୂର୍ବତନ ଅତିରିକ୍ତ ଆଇନ ପରାମର୍ଶଦାତା କାଳୀ ଚରଣ ମିଶ୍ର ଓ ବରିଷ୍ଠ ଆଇନଜୀବୀ ଅବିନାଶ ପାଢ଼ୀଙ୍କୁ ସ୍ଵତନ୍ତ୍ର ପିପି ଭାବେ ନିୟୋଜିତ କରିବାକୁ ଚିଠି ଲେଖିଛନ୍ତି ଏସ୍ପି । କାଳୀ ଚରଣ ମିଶ୍ରଙ୍କ ଓଡ଼ିଶାର ବହୁ ଚର୍ଚ୍ଚିତ ଅଞ୍ଜନା ମିଶ୍ର ମାମଲା ପରିଚାଳନାର ଦକ୍ଷତା ରହିଛି । ସେହିପରି ଅବିନାଶ ପାଢ଼ୀ ବି ବହୁ ଅପରାଧିକ ମାମଲା ପରିଚାଳନା କରିଛନ୍ତି
ତେଣୁ ଏହି ଦୁଇ ଅଭିଜ୍ଞ ଓକିଲଙ୍କୁ ନିୟୋଜିତ କରିବାକୁ ବ୍ରହ୍ମପୁର ଏସ୍ପି କହିଛନ୍ତି । ଆଇନଜୀବୀ ପୀତବାସ ପଣ୍ଡା ହତ୍ୟା ଘଟଣାରେ ଏ ପର୍ଯ୍ୟନ୍ତ ପୋଲିସ୍ ୧୩ ଜଣଙ୍କୁ ଗିରଫ କରିସାରିଛି । ଏବେ ବି ପୀତବାସଙ୍କୁ ଗୁଳିମାଡ଼ କରିଥିବା କୁରୁପତି ଭୂୟାଁ ଫେରାର୍ ରହିଛି । ଏହି ମାମଲାରେ ପୋଲିସ୍ ପୂର୍ବତନ ବିଧାୟକ ତଥା ବିଜେଡି ନେତା ବିକ୍ରମ ପଣ୍ଡାଙ୍କୁ ଗିରଫ କରିଛି ।
ମିଳିଥିବା ସୂଚନା ଅନୁସାରେ ବିକ୍ରମ ପଣ୍ଡାଙ୍କ ପାଇଁ କୋର୍ଟରେ ଲଢ଼ିବେ ୪୪ ଜଣ ଓକିଲ । ୪୪ ଜଣ ଓକିଲ କୋର୍ଟରେ ୱକାଲାତନାମା ଦାଖଲ କରିଛନ୍ତି । ବିକ୍ରମଙ୍କ ଭଳି କର୍ପୋରେଟର ମଳୟ ବିଷୋୟୀ ଓ ବିଜେଡି ନେତା ମଦନ ଦଳେଇଙ୍କ ପାଇଁ ମଧ୍ୟ ସେହି ୪୪ ଜଣ ଓକିଲ ଲଢ଼ିବେ ।